Ankarada Türk Dövlətləri Qadın Birliyi Təşkilatının (TDKT) təsis konfransı keçirilib. Konfransa Türk dövlətlərindən olan nümayəndələr, o cümlədənTürkiyə, Azərbaycan, Qazaxıstan, Özbəkistan, Tatarıstan və başqa türk dövlətlərinin təmsilçiləri qatılıblar. Konfransda öncə bir dəqiqəlik sükutla türk dünyası şəhidlərinin xatirəsi yad edilib, Türkiyənin İstiqlal marşı səsləndirilib.

Ziraat yüksek mühəndisi Sibel Güneginin moderatorluğu ilə keçirilən konfransa Türkiyə, Azərbaycan, Qazaxıstan, Özbəkistan, Tatarıstandan müxtəlif sahələrdə çalışan fəal xanımlar qatılıblar. Qurumun baş katibi, Beynəlxalq Dialog və İnkişaf Alyansının sədri Nüşabə Məmmədova tədbir iştirakçılarını salamlayaraq TDKT-nın yaranmasını şərtləndirən amillərdən, məqsədlər və əsas fəaliyyət istiqamətləri haqqında məlumat verib. Təsis konfransının təşkilinə verdikləri dəstəyə görə TDKT-nin Türkiyə, Azərbaycan və KKTC təmsilçilərinə minnətdarlıq ifadə olunub. Tədbirdə Azərbaycan Respublikasının Dövlət Dil Komissiyası yanında Monitorinq Mərkəzinin direktoru, türkoloq professor Sevinc Əliyeva, Əməkdar jurnalist Mətanət Ağamirli, “Artmood Agency”-nin təsisçisi Xəyalə Mütəllimova, Türkiyə Cümhuriyyəti 25/26/27-ci dönəm İstanbul millət vəkili Arzu Erdem, Türkiye Toxuculuq Atlas Layihəsi Koordinatoru Ayşə Dizman və onlarla tanınmış simalar iştirak ediblər.

Müxtəlif ölkələri təmsil edən elm xadimləri, QHT rəhbərləri, iş adamları, türk dünyası araşdırmaçıları, media nümayəndələri çıxış edərək TDKT-nın yaranmasının türk dünyası, türk milləti üçün önəmindən, əhəmiyyətindən geniş bəhs ediblər. Bildirilib ki, təşkilatın müəyyən olunmuş yol xəritəsi ilə birgə addımlamaqla Türk dünyası qadınları arasında birliyin, ən müxtəlif sahələrdə əməkdaşlığın inkişafını hədəfləyən TDKT üçün Türk xalqlarının böyük mədəni-tarixi irsinin təbliği, tanınması və yayılması, tarixi bağlara, ümumi dil, mədəniyyət və ənənələrə əsaslanaraq, bütün istiqamətlərdə əməkdaşlığın daha da dərinləşməsi prioritetlərdir. Bundan başqa tərəflər arasında təmasların təşviqi, qarşılıqlı hüquqi yardımın göstərilməsi və hüquqi münasibətlərin müxtəlif sahələrində əməkdaşlıq üzrə məsələlərin müzakirəsinin həyata keçirilməsi təşkilatın əsas fəaliyyət programıdır.

Economy